Hepatitis C viral infection ခေါ် အသည်းရောင်အသားဝါ C ပိုးအကြောင်း သိကောင်းစရာ
အသည်းရောင်အသားဝါဖြစ်စေတဲ့ virus ပိုးတွေ အများကြီးရှိတဲ့ အထဲကမှ အဖြစ်အများဆုံး virus အုပ်စု အမျိုးအစားဖြစ်တဲ့ Viral Hepatitis A , B , C , D နှင့် E တို့အနက် ဒီနေ့မှာတော့ VAA မှ စာဖတ်ပရိတ်သတ်တွေရဲ့ တောင်းဆိုချက်အရ Hepatitis C virus လို့ခေါ်တဲ့ အသည်းရောင်အသားဝါ C ပိုးအကြောင်း ကိုပြောပြပေးသွားမှာ ဖြစ်ပါတယ်။
🔴 Hepatitis C virus ခေါ် အသည်းရောင်အသားဝါ C ပိုး ဘယ်လိုကူးစက်သလဲ ?
အသည်းရောင်အသားဝါ C ပိုးသည် သွေးမှတဆင့် အဓိက ကူးစက်ပါတယ် ….
အသည်းရောင်အသားဝါ C ပိုးပါသော သွေးသွင်းမိခြင်း ၊ အသည်းရောင်အသားဝါ C ပိုးပါသော အပ်ဖြင့် ဆေးထိုးခြင်း ၊ ဆေးမှင်ကြောင်ထိုးခြင်း ၊ နားဖောက်ခြင်း ၊ အပ်စိုက်ခြင်း ၊ အသည်းရောင်အသားဝါ C ပိုးရှိသောသူနှင့် ဘလိတ်ဓား မုတ်ဆိတ်ရိတ်ဓား သွားတိုက်တံ အစရှိသည်တို့ကို အတူတကွသုံးစွဲခြင်း တို့အပြင် အသည်းရောင်အသားဝါ C ပိုးရှိသောသူနှင့် အကာအကွယ်မဲ့ လိင်ဆက်ဆံခြင်း တို့မှလည်း ကူးစက်နိုင်ပါတယ်…
ထို့အပြင် အသည်းရောင်အသားဝါ C ပိုးရှိသော ကိုယ်ဝန်ဆောင်မိခင် ထံမှ ကလေးကိုလဲ ကူးစက်နိုင်ပါတယ်။
🔴 ဘယ်လိုလူတွေက ကူးစက်ခံရနိုင်ချေများလဲ ?
သွေးခဏခဏသွင်းရလေ့ရှိသူများ ၊ သွေးကြောအတွင်း မူးယစ်ဆေး ၊ အကြောဆေးထိုးလေ့ရှိသူများ ၊ လုပ်ငန်းခွင်အတွင်း သွေး နှင့် ဆက်စပ်ပစ္စည်းများ ထိတွေ့မှုရှိသော ကျန်းမာရေးဝန်ထမ်းများ ၊ ဆေးမှင်ကြောင် ထိုးလေ့ရှိသူများ ၊ နားခဏခဏဖောက်လေ့ရှိသူများ ၊ လိင်ဆက်ဆံဖော်များသူများ စသည့်သူတွေကတော့ ရောဂါပိုး ကူးစက်ခံရနိုင်ချေ များပါတယ်။
🔴 ဘယ်လိုရောဂါလက္ခဏာတွေ ခံစားရမလဲ ?
အသည်းရောင်အသားဝါ C ပိုးကူးစက်ခံရသူ အနည်းငယ်သာ Non-specific prodromal illness လို့ခေါ်တဲ့ ဘယ်ရောဂါဖြစ်နေလဲ တိတိကျကျ မပြောနိုင်သော လက္ခဏာတွေဖြစ်တဲ့ ခေါင်းကိုက်ခြင်း ၊ မစားချင်မသောက်ချင်ဖြစ်ခြင်း ၊ ပျို့အန်ခြင်း ၊ ဝမ်းလျှောခြင်း ၊ ဗိုက်အောင့်ခြင်း ၊ ကိုယ်လက်မအီမသာဖြစ်ခြင်း ၊ အရိုးအဆစ် ကြွက်သားတွေ နာခြင်း ၊ ဆီးအရောင်ရင့်ခြင်း ၊ ဝမ်းအရောင်ဖျော့ခြင်း အစရှိတဲ့ လက္ခဏာတွေကို အသားမဝါခင် ရက်အနည်းငယ်ကနေ ၂ ပတ်အတွင်း ရှေ့ပြေးလက္ခဏာတွေအနေနဲ့ ခံစားရလေ့ရှိပြီး အသည်းရောင်အသားဝါ C ပိုး ကူးစက်ခံရသူအများစုကတော့ နာတာရှည်အသည်းရောင်ခြင်း ၊ အသည်းကင်ဆာဖြစ်ခြင်းတို့ ဖြစ်လေ့ရှိပါတယ် ။
🔴 အသည်းရောင်အသားဝါ C ပိုးရှိကြောင်းဘယ်လိုသိနိုင်မလဲ ?
Anti HCV antibodies လို့ခေါ်တဲ့ အသည်းရောင်အသားဝါ C ပိုးဝင်လာရင် ခန္ဓာကိုယ်က ပြန်တိုက်ခိုက်တဲ့ Antibodies ခေါ် ကိုယ်ခံအားကို စစ်ခြင်းအားဖြင့် သိနိုင်ပါတယ်။
🔴 နောက်ဆက်တွဲ ဘာတွေဖြစ်နိုင်မလဲ ?
အထက်မှာဖော်ပြခဲ့တဲ့အတိုင်းပဲ အသည်းရောင်အသားဝါ C ပိုးကူးစက်ခံရသူ အချို့သည် လတ်တလော အသည်းရောင် အသားဝါခြင်း သာမန်ရောဂါလက္ခဏာသာ ခံစားရပြီး သက်သာသွားသော်လည်း အများစုမှာ နာတာရှည် အသည်းရောင်ခြင်း ၊ အသည်းခြောက်ခြင်း နှင့် အသည်းကင်ဆာတို့အထိ ဖြစ်နိုင်ပြီး အသက်အန္တရာယ်ရှိပါတယ်။
🔴 ဘယ်လိုကုသမလဲ ?
အသည်းရောင်အသားဝါ C ပိုးအတွက် Antiviral agents တွေကို ဆရာဝန် ညွှန်ကြားထားတဲ့အတိုင်း စနစ်တကျ ကုသမှုခံယူပါက ကုသမှုခံယူပြီး ၃ လ မှ ၆ လအတွင်း ပျောက်ကင်းနိုင်ပါသည်။
အနားယူခြင်း ၊ ရေများများသောက်ခြင်း ၊ အရက်ရှောင်ခြင်း ၊ အာဟာရပြည့်စွာ စားသောက်ခြင်း အစရှိသည်တို့ကိုလည်း လုပ်ဆောင်ပေးဖို့ လိုအပ်ပါတယ်။
🔴 ဘယ်လိုကာကွယ်မလဲ ?
ရောဂါပိုးကင်းစင်ကြောင်း စစ်ဆေးထားသော သွေးကိုသာသွင်းခြင်း ၊ အခြားသူတစ်ဦး၏ သွေးနှင့်ဆက်စပ်သော ပစ္စည်းကို တိုက်ရိုက်မထိမိစေရန် သတိထားကိုင်တွယ်ခြင်း ၊ တစ်ခါသုံးဆေးထိုးအပ်ကို အသုံးပြုခြင်း ၊ အသုံးပြုပြီးသော ဆေးထိုးအပ်များကိုလဲ စနစ်တကျစွန့်ပစ်ခြင်း ၊ ဘလိတ်ဓား ၊ မုတ်ဆိတ်ရိတ်ဓား ၊ သွားတိုက်တံ အစရှိသည့် တစ်ကိုယ်ရည်သုံးပစ္စည်းများအား သီးခြားစီအသုံးပြုခြင်း ၊ အသည်းရောင်အသားဝါ C ပိုးရှိသူ နှင့် လိင်ဆက်ဆံလျှင်လည်း အကာအကွယ်အသုံးပြုခြင်း အစရှိသည်တို့ ဖြစ်သည်။
ဒါကြောင့် အသည်းရောင် အသားဝါ C ပိုးရဲ့ အကြောင်းတွေကိုဖတ်ရှုပြီးဆောင်ရန် ၊ ရှောင်ရန်များကို လိုက်နာလျှင် အသည်းရောင်အသားဝါ C ပိုး ရောဂါဘေးမှ ကင်းဝေးပါစေကြောင်း ဆုမွန်ကောင်းတောင်းလိုက်ရပါသည် ။
VAA(VHCA Alumni Association)
ပြည်သူ မှ ပြည်သူ သို့
ဗဟုသုတများစွာရလို့ ကျေးဇူးပါVAA
ReplyDelete