နားတွေ အရမ်းယားနေတာ ဘာကြောင့်များလဲ!

 💠💠💠 နားတွေ အရမ်းယားနေတာ ဘာကြောင့်များလဲ! 💠💠💠

နားယားတာက အတော်လေး ကသိကအောက် ဖြစ်စရာ ကောင်းတဲ့ ကိစ္စပါ ။ ဒါပေမယ့် တော်တော်များများက နားယားတာကို ပုံစံအမျိုးမျိုး အကြောင်းရင်းခံ အဖုံဖုံ နဲ့ ကြုံဖူးကြမှာပါ ။ အခုတစ်ခေါက်တော့ နားတွေ အရမ်းယားနေတာ ဘာကြောင့်များလဲ ဆိုတာ နဲ့ ဘယ်လို သက်သာအောင် လုပ်ရမလဲ ဆိုတာကို ပြောပြပေးသွားပါမယ် ။

🔴 နားတွေ အရမ်းယားနေတာ ဘာကြောင့်များလဲ!

နားတွေ အရမ်းယားနေတာ ဘာကြောင့်များလဲ ဆိုတော့ အခုလို အကြောင်းအရင်းတွေကြောင့်ပါ ။

♦ နားပိုးဝင်တာ

နားယားတယ်ဆိုတာက တစ်ခါတလေမှာ နားအတွင်းပိုင်းထဲကို ပိုးဝင် ကူးစက်တာကို ဖော်ပြနေတဲ့ လက္ခဏာ တစ်ခုပါ ။ ဒီလိုမျိုး ပိုးဝင်တာကြောင့် နားယားတာက အစပိုင်းမှာ သိပ်မပြင်းထန်ပေမယ့် နောက်ပိုင်းမှာ ပိုဆိုးလာနိုင်ပါတယ် ။ နားထဲကို ပိုးဝင်တာက နားယားတာနဲ့အတူ အဖျားဝင်တာမျိုးတွေလည်း ဖြစ်နိုင်ပါတယ် ။ နာတာရှည် နားပိုးဝင်တာက  ခဏခဏ ပြန်ဖြစ်တတ်ပြီး သေချာလေး ကုသဖို့ လိုပါမယ် ။

♦ နားအတွင်း ခြောက်သွေ့တာ

နားက ပုံမှန်အားဖြင့် အဆီနဲ့ နားဖာချေးတွေကို ထုတ်လုပ်ပါတယ် ။ တကယ်လို့ နားဖာချေးတွေကို အလွန်အကျွံ သန့်စင်လိုက်မိမယ်ဆိုရင်တော့ နားက ပြောင်ရှင်းပြီး ခြောက်သွေ့မှုက နားယားတာ နဲ့ နားထဲမှာ ခိုးလိုးခုလု ဖြစ်တာမျိုး ဖြစ်စေနိုင်ပါတယ် ။

♦ အစားအစာ ဓာတ်မတည့်တာ

အချို့သော အစားအစာတွေက ဓာတ်မတည့်မှုကို ဖြစ်စေပြီး နားယားတာကို ဖြစ်စေနိုင်ပါတယ် ။ ဘယ်လို အစားအစာတွေလဲဆိုတော့ အခွံမာသီးတွေ ၊ နို့ ၊ ငါး နဲ့ ပင်လယ်စာ ၊ ဂျုံ ၊ ပဲပိစပ် စတာတွေပါ ။ ဒီလို အစာဓာတ်မတည့်မှုက မျက်နှာနဲ့ နားအတွင်းတွေအပြင် ခန္ဓာကိုယ် အနှံ့ကို ယားယံစေနိုင်ပါတယ် ။ အင်ပြင် ထွက်တာမျိုးတွေလည်း ရှိနိုင်ပါတယ် ။

ဒီလို ဓာတ်မတည့်မှုနဲ့ အတူ အသက်ရှူရပါ ခက်လာမယ်ဆိုရင်တော့ ဆရာဝန် နဲ့ ချက်ချင်း ပြသကြည့်ဖို့ လိုပါမယ် ။

♦ နားဖာချေး ပိတ်ဆို့နေတာ

နားထဲမှာ နားဖာချေး ပိတ်နေတာကလည်း အသံသေချာ  မကြားရတာကို ဖြစ်စေနိုင်သလို နားအတွင်းပိုင်း ပိုးဝင်တာကိုလည်း ဖြစ်စေနိုင်ပါတယ် ။ နားဖာချေးဆိုတာက နားထဲက ဆဲလ်သေတွေ ၊ အညစ်အကြေးတွေကို နားပြင်ပကို ထွက်ရှိလာအောင် လုပ်ဆောင်ပေးတဲ့အရာပါ ။ နာဖားချေးတွေက ပုံမှန်ဆိုရင် သူ့အလိုလို ထွက်လာပြီး ရေချိုးလိုက်ရင် ထွက်လာတာကြောင့် သီးသန့်ကြီးနားက‌လော်စရာ မလိုပါဘူး ။ နားဖာချေးတွေ သန့်သွားအောင် ကလော်လိုက်မှ အတွင်းထဲကို ပိုဝင်သွားပြီး နားဖာချေးပိတ်ဆို့တာ ဖြစ်တတ်ပါတယ် ။ နားဖာချေးတွေက အချိန်ကြာလာချိန်မှာ ခြောက်သွေ့သွားပြီး နားယားတာကို ခံစားရနိုင်ပါတယ် ။

♦ နားကြား ကိရိယာ

နားကြားကိရိယာ တပ်ဆင်ထားရတာကလည်း နားယားတာကို ဖြစ်စေနိုင်ပါတယ် ။ အကြောင်းကတော့ နားကြား ကိရိယာမှာ ပလပ်စတစ် အပေါ်စွပ်လေး ပါနေတာကြောင့်ပါ ။ ဓာတ်မတည့် ဖြစ်လွယ်တဲ့ သူတွေမှာဆိုရင် အသေးစား ဓာတ်မတည့်မှုလေးတွေ ဖြစ်ပြီး နားယားတာကို ခံစားရနိုင်ပါတယ် ။ တစ်ခါတလေမှာ နားကြားကိရိယာ နဲ့ နား နဲ့ ကြားမှာ ရေဝင်နေတာကြောင့်လည်း နားယားတတ်ပါတယ် ။

♦ နားထဲ ရေဝင်တာ

နားထဲ ရေဝင်တာက နားပိုးဝင် ကူးစက်တာကို ဖြစ်စေနိုင်သလို နားယားတာကိုလည်း ဖြစ်စေနိုင်ပါတယ် ။ ရေဝင်နေတဲ့အတွက် နားထဲမှာ ဘက်တီးရီးယားတွေ ပေါက်ဖွားပြီး ပိုးဝင်လွယ်စေတာကြောင့်ပါ ။

♦ အရေပြား ပြဿနာ

ဆိုရီရေးစစ်၊ အရေပြား ရောင်ရမ်းနာ၊ နှင်းခူ စတာလိုမျိုး အရေပြား ပြဿနာကို ခံစားနေရမယ်ဆိုရင်လည်း နားအရေပြားကိုပါ ထိခိုက်စေပြီး နားယားတာကို ခံစားရနိုင်ပါတယ် ။

🔴 နားယားတာကို ဘယ်လို သက်သာအောင် လုပ်မလဲ!

နားယားတာကို ပုံမှန်အားဖြင့် အိမ်တွင်းကုထုံးတွေနဲ့ သက်သာအောင် လုပ်ဆောင်လို့ ရပါတယ် ။

နားယားတာက အသားခြောက်တာကြောင့် ဖြစ်မယ်ဆိုရင် --- နားထဲကို အုန်းဆီ ၊ သံလွင်ဆီ ၊ baby oil စတာလေးတွေကို ၂ စက် ၃ စက်လောက် ထည့်ပေးလို့ ရပါတယ် ။

နားဖာချေးတွေကြောင့် ဖြစ်မယ်ဆိုရင် --- OTC နား အစက်ချ ဆေးတစ်မျိုးမျိုးနဲ့ အစက်ချပြီး သန့်စင်လို့ ရပါတယ် ။

နားကြားကိရိယာကြောင့် ဖြစ်မယ်ဆိုရင် --- နားကြားကိရိယာကို သေချာ သန့်စင်ပြီးမှ တပ်ဆင်တာမျိုး လုပ်ဆောင်ပေးပါ ။ 

ဓာတ်မတည့်တာမျိုးကြောင့် ဖြစ်မယ်ဆိုရင် --- ဆရာဝန်နဲ့ တိုင်ပင်ပါ ။

တကယ်လို့ ဒီနည်းလမ်းတွေနဲ့ လုပ်ဆောင်ပေမယ့် နားယားတာက မသက်သာဘူး ။ ပိုဆိုးလာမယ် ။ အကြာားအာရုံကို ထိခိုက်တာမျိုးအထိ ဖြစ်လာမယ်ဆိုရင်တော့ ဆရာဝန်နဲ့ သေချာလေး ပြသလို့ လိုအပ်တဲ့ စစ်ဆေးမှုကို ခံယူဖို့ တိုက်တွန်းပါရစေ ။